ឯកឧត្តម នេត្រ ភក្ត្រា រដ្ឋមន្រ្តីក្រសួងព័ត៌មាន នៅព្រឹកថ្ងៃទី១ ខែកញ្ញា ឆ្នាំ២០២៦ បានអនុញ្ញាតជូនគណៈប្រតិភូសមាគមនិស្សិតនវានុវត្តន៍វេជ្ជសាស្ត្រកម្ពុជា ដឹកនាំដោយ ឯកឧត្តមវេជ្ជបណ្ឌិត សៅ សំបូរ ទីប្រឹក្សាក្រសួងព័ត៌មាន និងជាប្រធានក្រុមការងារគ្រូពេទ្យស័្មគ្រចិត្តក្រសួងព័ត៌មាន ចូលជួបសម្តែងការគួរសម និងរាយការណ៍អំពីសកម្មភាពរបស់សមាគម។
ជំនួបនេះបានប្រព្រឹត្តទៅនៅទីស្តីការក្រសួងព័ត៌មាន រាជធានីភ្នំពេញ។
ក្នុងឱកាសនោះ ឯកឧត្តមវេជ្ជបណ្ឌិត សៅ សំបូរ បានជម្រាបជូនឯកឧត្តមរដ្ឋមន្រ្តីអំពីបេសកកម្មរបស់សមាគមនិស្សិតនវានុវត្តន៍វេជ្ជសាស្ត្រកម្ពុជា ដែលតែងតែរួមចំណែកយ៉ាងសកម្មក្នុងកិច្ចការមនុស្សធម៌ តាមរយៈការរៀបចំសកម្មភាពពិនិត្យ និងព្យាបាលជំងឺជូនប្រជាពលរដ្ឋដោយឥតគិតថ្លៃនៅតាមបណ្តាខេត្តនានា។ លើសពីនេះ សមាគមបាននាំយកនូវថ្នាំសង្កូវមួយចំនួនធំ ដើម្បីបរិច្ចាគជូនក្រសួងព័ត៌មាន សម្រាប់បន្តចែកជូនដល់ប្រជាពលរដ្ឋដែលកំពុងរងគ្រោះដោយសារទឹកជំនន់នៅក្នុងខេត្តក្រចេះ។
ឯកឧត្តម នេត្រ ភក្ត្រា បានសម្តែងនូវការកោតសរសើរ និងថ្លែងអំណរគុណយ៉ាងជ្រាលជ្រៅចំពោះសមាគមនិស្សិតនវានុវត្តន៍វេជ្ជសាស្ត្រកម្ពុជា ក៏ដូចជាឯកឧត្តមវេជ្ជបណ្ឌិត សៅ សំបូរ ដែលបានយកចិត្តទុកដាក់ និងចូលរួមចំណែកយ៉ាងសកម្មក្នុងការងារសង្គម ជាពិសេសការជួយដល់ប្រជាពលរដ្ឋដែលកំពុងជួបការលំបាក។
ឯកឧត្តមរដ្ឋមន្រ្តីបានគូសបញ្ជាក់ថា កាយវិការដ៏ប្រពៃនេះ ពិតជាបានឆ្លុះបញ្ចាំងពីស្មារតីសាមគ្គីភាព និងការទទួលខុសត្រូវខ្ពស់ចំពោះសង្គមជាតិ។ ក្រសួងព័ត៌មាននឹងបន្តសហការ និងគាំទ្ររាល់សកម្មភាពមនុស្សធម៌របស់សមាគម ដើម្បីរួមចំណែកលើកកម្ពស់សុខុមាលភាពរបស់ប្រជាពលរដ្ឋកម្ពុជា៕
រូបថត៖ ខឹម សុវណ្ណារ៉ា
