វេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខណ្ឌមានជ័យ អាណត្តិទី ៤ ឆ្នាំ ២០២៦ ក្រោមអធិបតីភាព លោក សេង គន្ធ អភិបាលនៃគណៈអភិបាលខណ្ឌមានជ័យ"

វេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខណ្ឌមានជ័យ អាណត្តិទី ៤ ឆ្នាំ២០២៦

ខណ្ឌមានជ័យ៖ នៅព្រឹកថ្ងៃសុក្រ ១១រោច ខែបឋមាសាឍ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី១០ ខែកក្កដា ឆ្នាំ២០២៦ រដ្ឋបាលខណ្ឌមានជ័យ បានរៀបចំ «វេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខណ្ឌ» ដើម្បីពង្រឹងទំនាក់ទំនងរវាងអាជ្ញាធរមូលដ្ឋាន និងប្រជាពលរដ្ឋ។

ពិធីនេះប្រព្រឹត្តទៅក្រោមអធិបតីភាព លោក សេង គន្ធ អភិបាលនៃគណៈអភិបាលខណ្ឌមានជ័យ ដោយមានការអញ្ជើញចូលរួមពីលោក-លោកស្រី សមាជិកក្រុមប្រឹក្សាខណ្ឌ, លោកអធិការនគរបាលខណ្ឌ, លោកមេបញ្ជាការកងរាជអាវុធហត្ថខណ្ឌ, គណៈអភិបាលរងខណ្ឌ, នាយករដ្ឋបាល, ប្រធានការិយាល័យជំនាញជុំវិញខណ្ឌ, លោកចៅសង្កាត់, សមាជិកក្រុមប្រឹក្សាសង្កាត់, នាយនគរបាលប៉ុស្តិ៍, មេភូមិ និងបងប្អូនប្រជាពលរដ្ឋយ៉ាងច្រើនកុះករ។

គោលបំណងនៃវេទិកានេះ គឺជាស្ពានតភ្ជាប់ទំនុកចិត្តដ៏សំខាន់រវាងអាជ្ញាធរ និងប្រជាពលរដ្ឋ ដោយផ្តោតលើគោលដៅសំខាន់ៗដូចជា៖

ការផ្សព្វផ្សាយសមិទ្ធផល៖ បង្ហាញពីសមិទ្ធផលការងារ និងផែនការអភិវឌ្ឍន៍នានារបស់រដ្ឋបាលខណ្ឌជូនដល់ប្រជាពលរដ្ឋបានជ្រាប។

ការស្តាប់មតិយោបល់៖ បើកឱកាសឱ្យប្រជាពលរដ្ឋក្នុងមូលដ្ឋាន បានលើកឡើងផ្ទាល់នូវបញ្ហាប្រឈម និងសំណូមពរផ្សេងៗ ពាក់ព័ន្ធនឹងជីវភាព និងសេវាសាធារណៈ។

ការដោះស្រាយបញ្ហា៖ ឈានទៅរកដំណោះស្រាយប្រកបដោយប្រសិទ្ធភាព និងទាន់ពេលវេលា ដើម្បីឆ្លើយតបទៅនឹងតម្រូវការចាំបាច់របស់ប្រជាពលរដ្ឋនៅមូលដ្ឋាន។

ក្នុងអំឡុងពេលនៃវេទិកា លោក សេង គន្ធ និងក្រុមការងារ បានឆ្លើយតបដោយផ្ទាល់ចំពោះសំណើ សំណួរ និងសំណូមពរនានារបស់ប្រជាពលរដ្ឋ។ លោកបានបញ្ជាក់ថា រាល់មតិយោបល់ដែលទទួលបាន នឹងត្រូវក្រុមប្រឹក្សាខណ្ឌ និងគណៈអភិបាលខណ្ឌ យកទៅពិភាក្សារួមគ្នា ដើម្បីស្វែងរកដំណោះស្រាយសមស្រប ធានាបាននូវសុខុមាលភាព និងភាពសុខដុមរមនាក្នុងមូលដ្ឋាន។

ជាកិច្ចបញ្ចប់ លោកអភិបាលខណ្ឌបានថ្លែងអំណរគុណយ៉ាងជ្រាលជ្រៅចំពោះភ្ញៀវកិត្តិយស និងបងប្អូនប្រជាពលរដ្ឋដែលបានចូលរួមក្នុងវេទិកានេះ ហើយបានជូនពរឱ្យអង្គពិធីទាំងមូលបានប្រកបដោយពុទ្ធពរទាំង ៤ ប្រការគឺ អាយុ វណ្ណៈ សុខៈ ពលៈ និងទទួលបានជោគជ័យគ្រប់ភារកិច្ច។

ដោយ÷ ឆុង ឈន