ឯកឧត្តម ឃួង ស្រេង ជួបពិភាក្សាការងារជាមួយតំណាងក្រុមហ៊ុន Beijing Urban Construction Group អំពីគម្រោងសាងសង់ប្រព័ន្ធដឹកជញ្ជូនរថភ្លើងលើអាកាស (Sky Train) នៅរាជធានីភ្នំពេញ
រាជធានីភ្នំពេញ៖ នៅថ្ងៃសៅរ៍ ទី០៦ ខែមិថុនា ឆ្នាំ២០២៦ ឯកឧត្តម ឃួង ស្រេង អភិបាលនៃគណៈអភិបាលរាជធានីភ្នំពេញ បានទទួលជួបសម្ដែងការគួរសម និងពិភាក្សាការងារជាមួយគណៈប្រតិភូជាន់ខ្ពស់នៃក្រុមហ៊ុន Beijing Urban Construction Group (BUCG) ដើម្បីពិភាក្សាលើវឌ្ឍនភាពនៃការសិក្សាគម្រោងអភិវឌ្ឍន៍ប្រព័ន្ធដឹកជញ្ជូនសាធារណៈតាមរថភ្លើងលើអាកាស (Sky Train) ក្នុងរាជធានីភ្នំពេញ។
ក្នុងជំនួបនេះ ឯកឧត្តម ឃួង ស្រេង បានសម្តែងការស្វាគមន៍យ៉ាងកក់ក្តៅចំពោះគណៈប្រតិភូក្រុមហ៊ុន Beijing Urban Construction Group ដែលបានបង្ហាញចំណាប់អារម្មណ៍ និងការប្តេជ្ញាចិត្តក្នុងការចូលរួមអភិវឌ្ឍហេដ្ឋារចនាសម្ព័ន្ធដឹកជញ្ជូននៅរាជធានីភ្នំពេញ។ ឯកឧត្តមបានគូសបញ្ជាក់ថា រដ្ឋបាលរាជធានីភ្នំពេញតែងតែបើកចំហ និងគាំទ្ររាល់គម្រោងអភិវឌ្ឍន៍ទាំងឡាយណាដែលស្របទៅនឹងផែនការមេរបស់រាជធានី ជាពិសេសការដោះស្រាយបញ្ហាកកស្ទះចរាចរណ៍ និងការលើកកម្ពស់សោភ័ណភាពទីក្រុងឆ្ពោះទៅរកការអភិវឌ្ឍដោយចីរភាព។
ដោយ ឆុង ឈន
