ភ្នំពេញ៖ នៅព្រឹកថ្ងៃទី១ ខែមិថុនា ឆ្នាំ២០២៦ លោកជំទាវ ទុយ សិរីរតនៈ នេត្រភក្ត្រា ប្រធានកិត្តិយសសាខាសមាគមនារីកម្ពុជាដើម្បីសន្តិភាព និងអភិវឌ្ឍន៍ ក្រសួងព័ត៌មាន បានដឹកនាំសមាជិក សមាជិកា ចុះសួរសុខទុក្ខ និងនាំយកថវិកាដែលជាការបរិច្ចាគសប្បុរសធម៌ចំនួន ១០៦លានរៀល ប្រគល់ជូនមូលនិធិគន្ធបុប្ផាកម្ពុជា ។
ក្នុងឱកាសនោះ លោកជំទាវ បានអញ្ជើញចុះសួរសុខទុក្ខកុមារតូចៗ ដែលកំពុងសម្រាកព្យាបាលជំងឺមហារីកនៅមន្ទីរពេទ្យគន្ធបុប្ផា ដោយក្តីអាណិតអាសូរ និងការយកចិត្តទុកដាក់ខ្ពស់។ លោកជំទាវ បានលើកឡើងថា ការបរិច្ចាគនេះ គឺជាការបង្ហាញពីទឹកចិត្តចែករំលែក ដើម្បីផ្តល់ស្នាមញញឹម និងជាការផ្តល់កម្លាំងចិត្តដល់កុមារទាំងអស់ ឱ្យមានកម្លាំងតស៊ូជម្នះរាល់ជំងឺកាចសាហាវទាំងឡាយ។
ថវិកាសរុបចំនួន ១០៦លានរៀល ដែលទទួលបានពីការចូលរួមរបស់សប្បុរសជន និងសមាជិកសមាគមនាពេលនេះ នឹងត្រូវប្រគល់ជូនមូលនិធិគន្ធបុប្ផាកម្ពុជា ដើម្បីចូលរួមចំណែកទ្រទ្រង់ដល់បេសកកម្មដ៏ថ្លៃថ្លានៃការពិនិត្យ ព្យាបាល និងថែទាំសុខភាពកុមារនៅកម្ពុជាដោយឥតគិតថ្លៃ។
សូមបញ្ជាក់ថា មូលនិធិគន្ធបុប្ផាកម្ពុជា បានដើរតួនាទីយ៉ាងសំខាន់ក្នុងការធានានិរន្តរភាពនៃសេវាសុខាភិបាលកុមារ។ រាល់ការបរិច្ចាគពីសប្បុរសជនគ្រប់មជ្ឈដ្ឋាន គឺជាកម្លាំងចលករដ៏ធំធេងក្នុងការជួយសង្គ្រោះជីវិតកុមារកម្ពុជាឱ្យរួចផុតពីការឈឺចាប់ និងនាំមកនូវភាពស្រស់បំព្រងក្នុងជីវិតដល់ពួកគេឡើងវិញ។
រូបថត៖ ខឹម សុវណ្ណារ៉ា
រាយការណ៍ដោយ៖ Na
k Vcta
ដោយ÷លោក ឆុង ឈន
