ចេញផ្សាយ:ថ្ងៃទី ២០ ខែកក្កដា ឆ្នាំ ២០២៦
ក្រុមជម្រើសជាតិអេស្ប៉ាញ បានសាងប្រវត្តិសាស្ត្រថ្មីនៅក្នុងព្រឹត្តិការណ៍បាល់ទាត់ពិភពលោក FIFA World Cup 2026 ដោយបានយកឈ្នះលើក្រុមជម្រើសជាតិអាហ្សង់ទីន ដែលជាម្ចាស់ជើងឯកឆ្នាំ ២០២២ ក្នុងលទ្ធផល ១-០ នៅក្នុងវគ្គផ្តាច់ព្រ័ត្រដ៏ស្វិតស្វាញ។
ការប្រកួតដ៏តានតឹងនេះត្រូវបានសម្រេចលទ្ធផលនៅនាទីទី ១០៦ ក្នុងម៉ោងបន្ថែម ១៥ នាទីដំបូង ដោយខ្សែប្រយុទ្ធ Ferran Torres ដែលបានរកគ្រាប់បាល់បញ្ចូលទីយ៉ាងល្អឥតខ្ចោះ បំបែកភាពស្ងប់ស្ងាត់ និងនាំមកនូវជ័យជម្នះដ៏មានន័យសម្រាប់ក្រុម «គោជល់»។
តាមរយៈជ័យជម្នះនេះ ក្រុមជម្រើសជាតិអេស្ប៉ាញទទួលបានប្រាក់រង្វាន់ចំនួន ៥០ លានដុល្លារអាមេរិក ក្នុងនាមជាម្ចាស់ជើងឯកពិភពលោក ខណៈដែលក្រុមជម្រើសជាតិអាហ្សង់ទីនទទួលបានទឹកប្រាក់ ៣៣ លានដុល្លារអាមេរិក ក្នុងនាមជាក្រុមជើងឯករង។
ជ័យជម្នះនេះមិនត្រឹមតែធ្វើឱ្យពិភពលោកមានការភ្ញាក់ផ្អើលប៉ុណ្ណោះទេ ប៉ុន្តែថែមទាំងជាការបំបែកកំណត់ត្រារង់ចាំអស់រយៈពេល ១៦ ឆ្នាំ។ នេះគឺជាការឈ្នះពានរង្វាន់ FIFA World Cup ជាលើកទី ២ របស់អេស្ប៉ាញ បន្ទាប់ពីពួកគេធ្លាប់បានគ្រងតំណែងជើងឯកម្តងរួចមកហើយកាលពីឆ្នាំ ២០១០ នៅឯប្រទេសអាហ្វ្រិកខាងត្បូង។
ជោគជ័យនេះឆ្លុះបញ្ចាំងពីការវិវត្តដ៏រឹងមាំនៃយុទ្ធសាស្ត្រ និងការប្រឹងប្រែងរបស់ក្រុមជម្រើសជាតិអេស្ប៉ាញ ដែលបន្តរក្សាបាននូវភាពលេចធ្លោក្នុងឆាកកីឡាបាល់ទាត់អន្តរជាតិ។
ដោយ÷ឆុង ឈន
